Montréal-Toronto
ar de en es fr it nl pt gsw rus wol ja zh

Montréal-Toronto

Websiite über Montréal, Toronto u wie ma am beschte zwüsche dene stetd reist.

Inhaut

Montréal
Toronto
Wie me vo Montréal uf Toronto chunnt
Links



[ Inhaut ]

Montréal

Montréal St.Georg's Chile
Montréal St.Georg's Chile
Foto: Fotopanorama.ch


S'wirtschaftszentrum vo Québec u die zwöitgröschti französisch sprächendi stadt vor wäut (nach Paris). Montréal isch 556km nord-östlich vo Toronto u ligt ufere insu im "Sankt Lorenz"-fluss . D'stadt isch 1642 aus Ville-Marie dür d'Jeanne-Mance u de Paul Chomedey de Maisonneuve gründet worde. Obschon me se hüfig aus d'metropole vo Québec bezeichnet, isch si nid d'provinzhouptstadt (das isch Québec-Stadt).

D'stadt isch d'heimat vo de Montreal Canadiens (NHL), dä Alouettes (American-Football) u vo Impact (Fuessbau). Während em summer finge hie villi festivals wie's Montreal Jazz Festival, d'Francopholies oder s'Just for Laughs Festival statt.

Meh informazione gitts uf dr Wikipedia-Siite über Montréal oder uf dr offizielle websiite vor stadt.



[ Inhaut ]

Toronto

Stadthalle vo Toronto
Stadthalle vo Toronto
Foto: Fotopanorama.ch


Wirtschaftszentrum u gröschti stadt vo Kanada. 556km süd-westlich vo Montreal, am ufer vom Lake Ontario glägä. Gründet dür de John Graves Simcoe im johr 1794 unger em name "York". Trotz em wit verbreitete gloube, Toronto sig d'houptstadt vo Kanada, isch si's nid (sondern Ottawa).

Sie isch d'heimatstadt vo de Toronto Maple Leafs (NHL), de Raptors (Basketball) u de Argonauts (American Football). D'stadt wird hüfig aus kulisse für Hollywood-film brucht. Daderbi übernimmt sie meischtens d'roue vore US-amerikanische stadt. Es kursiere grücht, dass aube, um Neu York realistisch darzsteue, zuesätzliche aubfau uf die süsch eher subere strasse kippt wärde muess.

Meh informazione, gitts uf der Wikipedia-Siite über Toronto oder dr Offizielle Websiite vor stadt.



[ Inhaut ]

Wie me vo Montréal uf Toronto chunnt

Mit em flugi

Wüu me z'Kanada lieber viu studie über ne hochgschwindigkeitszug schriibt, aus ne z'boue, isch s'flugzüg die schnäuschti variante zum die 556km zurüggzleggä. Houptsächlich drü fluggseuschafte (AirCanada, Porter u WestJet) flüge regumässig zwüsche de zwöi stedt. Dä flug säuber duret öppe 1h 15min, aber me darf d'ziit wo me brucht zum zum flughafe zcho und für de check-in nid vergässä. De priis für s'eifach-billet i dr economy variiert zwüsche 80 u 300$.

Flughafe vo Montréal

Vo de zauriche flughäfä vo Montréal wird im moment nume eine im linieverchehr agfloge: Dä Montreal-Pierre Elliott Trudeau International Airport. Die iheimische bruche immer no si aute name: "Dorval Airport".
Zum vor stadt zum flughafe z'cho, het me drü müglichkeite: Es taxi näh, mit em 747 Express Bus reise oder es abentüür im ÖV woge. Taxi: Abhängig vom verchehr, bruucht es taxi zwüsche 20 u 60 minute vo- u zum zentrum. Für d'Centre-Ville isch de priis uf 40.00$ fixiert. Dä 747 Express Bus: Dä bus fahrt 24 stung am tag vom Bus-Terminal (bir Metro Berri-UQAM) über d'metrostazion Lionel-Groulx zum flughafe. S'billet für die 45- bis 60-minütigi reis choschtet 10.00$. Dä fahrplan fingt me hie.
Mit em ÖV: Für 3.00$ die billigschti müglichkeit. Vor metro-stazion Lionel-Groulx us, nimmt me dä Bus 211 zum bahnhof Dorval. Dert stigt me entweder i bus 204 oder 209 zum flughafe um. D'reiseziit schwankt zwüsche 30 minute ure stung. Achtung: Ohni grossi erfahrig im ÖV z'Montréal oder gnueg gueti französisch- bezieigswis englischkenntnis zum sich nach em wäg z'erchundige, isch das die sicherschti art, si flug z'verpasse!

Flughäfä vo Toronto

Toronto het zwöi flughäfe: Billy Bishop Toronto City Airport (au Toronto City Centre Airport oder Toronto Island Airport gnennt) u Toronto Pearson International Airport. Dä erschti wird vor allem vo Porter aagfloge. Er ligt ufere insu vor em stadtzentrum u cha z'fues dür e tunnel oder mit ere fähre vo dr Bathurst Street im zentrum erreicht wärde. Viu grösser isch Toronto Pearson, wo vo aune angere gseuschaffte bedient wird. Pearson International ligt öppe 27km usserhaub vor dtadt. Diversi buslinie füere zum flughafe (Toronto Transit, GO Transit). Au gitts e Airport Shuttle (Union Pearson Express), Taxis u verschideni direkti buslinien zu angerne stedt ir provinz Ontario.

Mit em zug

Die bequemschti art zum reise. D'staatsbahn Via Rail bietet jede tag mehreri direkti verbindige zwüsche de zentre vo Toronto u Montréal aa. D'reiseziit ligt, je nach verbindig, zwüsche 4h 38min u 5h 36min. Dr priis für z'eifach-billet hanget vom zug un dodervo, wie früech me reserviert, ab. Die beschte priise lige bi 50$, chöi aber schnäu mou über 140$ stiige, u das au i dr economy.

Die schnäuschti verbindig isch die mit em zug nummero 66, wo d'strecki Toronto-Montreal i numme 4 stung u 38 minute zrüggleit. Mit'ere dürschnittsgschwindikeit vo meh aus 120km/h isch dä zug im moment dä schnäuschti i ganz nordamerika. (Dä Acela-Expressüzwische Boston u Neu-York het zwar e höcheri höchschtgschwindikeit, aber e chlineri durchschnittsgschwindikeit).

Mit em bus

Die büuigschti variante. Täglich wärde mehrere busverbindige vo Greyhound/Voyageur u Coach Canada aabotte. Der zwöiti wirb ir letschte ziit mit eme aagebot vo eim Dollar für si Megabus, aber die normale priise für's eifach-billet ligge zwüsche 30 u 100$. Abhängig vor route, duuret d'reis vo stadtzentrum zu stadtzentrum zwüsche 7 u 12 stung.

Mit em outo

Tuusig Insle
Tuusig Insle
Foto: Stefan Bracher


Dä normali wäg zum zwüsche dene beide stedt z'reise. D'outobahn (Autoroute) 20 z'Québec, wo dr name z'Ontario uf outobahn (Highway) 401 änderet, bringt eim direkt as ziu. S'benütze vor outobahn isch im moment gratis (kei vignette nötig). Abhängig dodervo, wie me faart, bruucht me 6 stung oder meh.
Wär's aber nid so pressant het. sött umbedingt zwüsche Kinston u Cornwall aahaute, zum d'Tuusig Insle z'bsueche.

Car-pooling

Z'Kanada isch es nid ungwöhnli, für langi streckene fahrgmeinschafte z'büude: Freii sitz im auto werde vo de fahrer gägä e beteiligung a de benzinchoschte abotte.

E bekannti websiite für söttigi agebot isch d' Rideshare Section uf Craigslist. Achtung: Doderbi handelt's sich um privati angebot, wo da abieter nid überprüeft wird. Drum wird explizit jedi haftig für allfälligi problem wo dur d'agebot uf dr Craigslist entstö, abglehnt.



[ Inhaut ]

Links


Jedi haftig für de inhaut vo de verlinkte siitene wird abglehnt.

Im text erwähnti websiite

Montréal

Toronto

Fluggsellschafte

Wiiteri transport-links

Wiiteri interessanti websiite

© Stefan Bracher